ព័ត៌មាន

នារសៀលថ្ងៃអាទិត្យ ១១រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៣ ខែកញ្ញា ឆ្នាំ២០២០ បណ្ឌិត តាន់ មុន្នីវណ្ណ អនុប្រធានសភាពាណិជ្ជកម្មកម្ពុជា តំណាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានចូលរួម “សន្និសីទភាពជាអ្នកដឹកនាំអន្តរជាតិ” តាមប្រព័ន្ធអនឡាញ។

សន្និសីទនេះ ត្រូវបានរៀបចំឡើងដោយសហព័ន្ធសន្តិភាពសកល ក្រោមមូលបទថា “ឱកាសនិងក្ដីសង្ឃឹមក្នុងអំឡុងវិបត្តិសកល៖ ការពឹងផ្អែកគ្នាទៅវិញទៅមក វិបុលភាពរួម និងគុណតម្លៃសកល” ។ ស្ថិតក្នុងវិបត្តិការរាតត្បាតជាសកលនៃជំងឺកូវីដ-១៩ សន្និសីទភាពជាអ្នកដឹកនាំអន្តរជាតិ ត្រូវបានរៀបចំតាមប្រព័ន្ធអនឡាញជាលើកដំបូង ក្នុងគោលបំណងពិភាក្សាអំពីបញ្ហាប្រឈមនានា និងលើកឡើងជាដំណោះស្រាយជាក់លាក់ និងការអនុវត្តល្អ ដោយផ្ដោតលើគោលការណ៍៣៖ ១)ការពឹងផ្អែកគ្នាទៅវិញទៅមក ២)វិបុលភាពរួម និង ៣)គុណតម្លៃសកល។
ក្នុងអំឡុងពេលសន្និសីទនេះ បណ្ឌិត តាន់ មុនី្នវណ្ណ បានចូលរួមថ្លែងសុន្ទរកថាទៅកាន់អង្គសន្និសីទទាំងមូលពាក់ព័ន្ធនឹង “តួនាទីរបស់អ្នកដឹកនាំធុរកិច្ចក្រោយការរាតត្បាតជំងឺកូវីដ-១៩” និងបានលើកឡើងអំពី៖
• តួនាទីដ៏សំខាន់របស់វិស័យឯកជនក្នុងចូលរួមប្រយុទ្ធប្រឆាំងនឹងការរាតត្បាតជំងឺងកូវីដ-១៩ ក៏ដូចជាចូលរួមកាត់បន្ថយផលវិបាកមកលើវិស័យសេដ្ឋកិច្ច តាមរយៈការផ្តល់នូវព័ត៌មានពិតនិងទាន់ពេលវេលាអំពីផលប៉ះពាល់របស់ជំងឺងកូវីដ-១៩ មកលើអាជីវកម្ម និងស្នើសុំអន្តរាគមន៍ទាន់ពេលវេលាពីរដ្ឋាភិបាល។
• កិច្ចសហការរវាងសភាពាណិជ្ជកម្មកម្ពុជាជាមួយបណ្ដាសមាគម និងសភាពាណិជ្ជកម្មអន្តរជាតិនៅកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩
• ការដាក់ចេញនូវវិធានការដ៏មានប្រសិទ្ធភាពរបស់រាជរដ្ឋាភិបាលក្នុងការទប់ស្កាត់ការរីករាលដាលជំងឺកូវីដ-១៩ នៅកម្ពុជា រួមនិងវិធានការរក្សាលំនឹងអាជីវកម្ម-ធុរកិច្ចក្នុងវិស័យដែលរងផលប៉ះពាល់ធ្ងន់ធ្ងរ

បណ្ឌិត តាន់ មុនី្នវណ្ណ បានសំណូមពរដល់គ្រប់ភាគីពាក់ព័ន្ធឲ្យជួយគាំទ្រគ្នាទៅវិញទៅមកទៅតាមលទ្ធភាព ជាពិសេស ការផ្ទេរបច្ចេកវិទ្យា និង ការចែករំលែកការអនុវត្តល្អៗ ដើម្បីរួមគ្នាដោះស្រាយវិបត្តិជាសាកលនេះ ឆ្ពោះទៅរកវិបុលភាពរួម។ បណ្ឌិត បានស្នើសុំឲ្យមានការអនុវត្តពេញលេញនូវអនុសាសន៍ដ៏មានប្រយោជន៍របស់អង្គសន្និសីទ ជាពិសេសធាតុចូលវិស័យឯកជន។