ចូលជាសមាជិក
ទំព័រដើម
អំពីសភាពាណិជ្ជកម្មកម្ពុជា
សភាពាណិជ្ជកម្ម ត្រូវបានបង្កើតឡើងក្រោមច្បាប់ស្តីពី សភាពាណិជ្ជកម្មក្នុងឆ្នាំ១៩៩៥ និងលិខិតបទដ្ឋានគតិយុត្ដិពាក់ព័ន្ធនានា។ សភាពាណិជ្ជកម្ម គឺជាស្ថាប័នមួយមិនសំដៅរកប្រាក់ចំណេញ ដែលសមាជិកភាពមានលក្ខណៈស្ម័គ្រចិត្ត និងជាស្ថាប័នតំណាងការពារផលប្រយោជន៍ជូនវិស័យឯកជនលើផ្នែកពាណិជ្ជកម្ម ឧស្សាហកម្ម សិប្បកម្ម សេវាកម្ម និងកសិកម្ម ដោយធ្វើសកម្មភាពបម្រើឲ្យសេដ្ឋកិច្ចជាតិ ក្នុងដែនសមត្ថកិច្ចរបស់ខ្លួន និងនៅទូទាំងប្រទេស។ ក្រុមហ៊ុនសហគ្រាសស្របច្បាប់ធុនតូច មធ្យម និងធំ គ្រប់វិស័យនៅទូទាំងប្រទេស អាចចូលជាសមាជិករបស់សភាពាណិជ្ជកម្មបានទាំងអស់។ សភាពាណិជ្ជកម្ម ដើរតួយ៉ាងសំខាន់ក្នុងការចូលរួមផ្ដល់យោបល់ជូនរាជរដ្ឋាភិបាល ដើម្បីសម្របសម្រួលអាជីវកម្មក្នុងវិស័យឯកជនឲ្យកាន់តែមានប្រសិទ្ធិភាព និងបង្កលក្ខណ:ធុរកិច្ចឲ្យកាន់តែល្អប្រសើរ។
សភាពាណិជ្ជកម្មកម្ពុជា ត្រូវបានបង្កើតឡើងក្នុងឆ្នាំ២០០៥ ដោយមានទំនាក់ទំនងនៅទូទាំងប្រទេស ព្រមទាំងដៃគូកម្រិតតំបន់ និងពិភពលោក។ បច្ចុប្បន្ន មានសភាពាណិជ្ជកម្មកម្ពុជា មានសភាពាណិជ្ជកម្មរាជធានី-ខេត្ត ចំនួនសរុប១៨ ដែលស្ថិតនៅក្រោមសភាពាណិជ្ជកម្មកម្ពុជា រួមមាន៖ ១)សភាពាណិជ្ជកម្មរាជធានីភ្នំពេញ ២)សភាពាណិជ្ជកម្មខេត្តពោធិ៍សាត់ ៣)សភាពាណិជ្ជកម្មខេត្តព្រៃវែង ៤)សភាពាណិជ្ជកម្មខេត្តកំពង់ស្ពឺ ៥) សភាពាណិជ្ជកម្មខេត្តស្វាយរៀង ៦)សភាពាណិជ្ជកម្មខេត្តព្រះសីហនុ ៧) សភាពាណិជ្ជកម្មខេត្តបន្ទាយមានជ័យ ៨)សភាពាណិជ្ជកម្មខេត្តកោះកុង ៩)សភាពាណិជ្ជកម្មមណ្ឌលខេត្តកំពង់ចាម-មណ្ឌលគីរី ១០)សភាពាណិជ្ជកម្មមណ្ឌលខេត្តកំពត-កែប ១១)សភាពាណិជ្ជកម្មខេត្តបាត់ដំបង ១២)សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ១៣)សភាពាណិជ្ជកម្មមណ្ឌលខេត្តកំពង់ធំ-ព្រះវិហារ ១៤)សភាពាណិជ្ជកម្មមណ្ឌលខេត្តកណ្តាល-កំពង់ឆ្នាំង ១៥)សភាពាណិជ្ជកម្មមណ្ឌលខេត្តក្រចេះ ស្ទឹងត្រែង-រតនគិរី ១៦)សភាពាណិជ្ជកម្មខេត្តតាកែវ ១៧)សភាពាណិជ្ជកម្មខេត្តត្បូងឃ្មុំ និង ១៨)សភាពាណិជ្ជកម្មខេត្តប៉ៃលិន ។ សភាពាណិជ្ជកម្មកម្ពុជា បាននឹងកំពុងរក្សាទំនាក់ទំនងយ៉ាងជិតស្និទ្ធជាមួយដៃគូអន្តរជាតិ រួមមាន៖ ក្រុមប្រឹក្សាពិគ្រោះយោបល់ធុរកិច្ចអាស៊ាន ក្រុមប្រឹក្សាធុរកិច្ចអាស៊ីខាងកើត ក្រុមប្រឹក្សាធុរកិច្ចមហាអនុតំបន់ទន្លេមេគង្គ ក្រុមប្រឹក្សាធុរកិច្ចឡាងឆាង-មេគង្គឡាង ក្រុមប្រឹក្សាធុរកិច្ចមេគង្គ-កូរ៉េ ក្រុមប្រឹក្សាធុរកិច្ចអាស៊ានកូរ៉េ បណ្តាញផលិតករអាស៊ាន។ល។ ក្នុងនោះផងដែរ យើងក៏បានចូលរួមសហការយ៉ាងជិតស្និទ្ធជាមួយស្ថានទូតបរទេសប្រចាំនៅកម្ពុជា ក៏ដូចជាស្ថានទូតកម្ពុជាប្រចាំនៅឯបរទេស។ គិតមកត្រឹមខែមេសា ឆ្នាំ២០២១ សភាពាណិជ្ជកម្មកម្ពុជា បានចុះអនុស្សារណៈយោគយល់ និងកិច្ចព្រមព្រៀងសហប្រតិបត្តិការសរុបចំនួន ១៣០ ជាមួយស្ថាប័នដៃគូជាតិ និងអន្តរជាតិ។ កាលពីឆ្នាំ២០១៨ សភាពាណិជ្ជកម្ម និងសមាគមពាណិជ្ជកម្មអន្តរជាតិចំនួន ២៦ នៅកម្ពុជា បានចុះអនុស្សារណៈយោគយល់ ក្នុងការផ្តល់សិទ្ធអំណាចទាំងស្រុងឲ្យសភាពាណិជ្ជកម្មកម្ពុជា មានសិទ្ធតំណាងស្របច្បាប់ក្នុងការសម្រេចចិត្ដជាឯកច្ឆ័ន្ទ ហើយក៏ជាស្ថាប័នតំណាងតែមួយគត់ក្នុងការមានសិទ្ធសន្ទនាលើកពីបញ្ហា និងផ្តល់យោបល់ជូនរាជរដ្ឋាភិបាលកម្ពុជា លើបញ្ហាជាក់លាក់ណាមួយដែលអាចនឹងមានផលប៉ះពាល់ដល់ អាជីវកម្មវិស័យឯកជនមួយផ្នែក ឬទាំងស្រុង។
អនុលោមតាមអនុក្រឹត្យលេខ១៦ អនក្រ.បក ចុះថ្ងៃទី០៧ ខែកុម្ភ: ឆ្នាំ២០១៧ ស្ដីពី ការរៀបចំនិងការប្រព្រឹត្ដិរបស់សភាពាណិជ្ជកម្មកម្ពុជា បានកំណត់តួនាទី ភារកិច្ចដូចខាងក្រោម៖
- ចូលរួមអនុវត្តគោលនយោបាយសេដ្ឋកិច្ច ពាណិជ្ជកម្ម
- ផ្តល់ជូនរាជរដ្ឋាភិបាលនូវយោបល់ និងព័ត៌មានស្តីពីសេដ្ឋកិច្ច និងវិនិយោគ
- ជាដៃគូចរចាជាមួយរាជរដ្ឋាភិបាល
- ធ្វើទំនាក់ទំនងជាមួយប្រភពសេដ្ឋកិច្ច និងហិរញ្ញវត្ថុក្រៅប្រទេស
- បង្កើតវគ្គបណ្តុះបណ្តាល ដល់គ្រឹះស្ថានអាជីវកម្ម
- ចូលរួមសកម្មភាពជាមួយសភាពាណិជ្ជកម្មក្នុងតំបន់ និងពិភពលោក -ល-។
ម្យ៉ាងទៀត សភាពាណិជ្ជកម្មកម្ពុជា គឺជាលេខាធិការដ្ឋានផ្នែកឯកជននៃវេទិការាជរដ្ឋាភិបាល-ផ្នែកឯកជន ចាប់តាំងពីឆ្នាំ២០១១មក ហើយបច្ចុប្បន្ននេះ យើងមានក្រុមការងារចំនួន ១៣ ដូចខាងក្រោម៖
- កសិកម្ម និងកសិឧស្សាហកម្ម
- ទេសចរណ៍
- កម្មន្តសាល សហគ្រាសធុនតូច និងមធ្យម និងសេវា
- នីតិកម្ម ពន្ធដារ និងអភិបាលកិច្ច
- ធនាគារ និងសេវាកម្មហិរញ្ញវត្ថុ
- ហេដ្ឋារចនាសម្ព័ន្ធ និងដឹកជញ្ជូន
- ផលិតកម្មកែច្នៃសម្រាប់ការនាំចេញ និងកិច្ចសម្រួលពាណិជ្ជកម្ម
- ទំនាក់ទំនងវិជ្ជាជីវៈ
- ស្រូវអង្ករ
- ថាមពល
- អប់រំ
- សុខាភិបាល
- សំណង់ និងអចលនទ្រព្យ
លើសពីនេះទៅទៀត សភាពាណិជ្ជកម្មកម្ពុជា គឺជាដៃគូពិភាក្សាជាមួយអគ្គនាយកដ្ឋានគយនិងរដ្ឋករ អគ្គនាយកដ្ឋានពន្ធដារ និងសាលារាជធានីភ្នំពេញផងដែរ ក្រោមយន្តការភាពជាដៃគូគយ-ផ្នែកឯកជន ភាពជាដៃគូអគ្គនាយកដ្ឋានពន្ធដារ-ផ្នែកឯកជន និងភាពជាដៃគូសាលារាជធានីភ្នំពេញ-សភាពាណិជ្ជកម្មកម្ពុជា។
សភាពាណិជ្ជកម្មកម្ពុជា គឺជាស្ថាប័នតែមួយគត់នៅកម្ពុជា ដែលទទួលស្គាល់ដោយ ជីអេ១អន្តរជាតិ (GS1 International) ជាអ្នកផ្តល់លេខបារកូដទៅដល់គ្រប់សហគ្រាសទាំងអស់នៅកម្ពុជា ចាប់តាំងពីឆ្នាំ២០០៣ រហូតមក។ សមាជិកបារកូដកម្ពុជា មានប្រតិបត្តិការអាជីវកម្មនៅទូទាំងផ្ទៃប្រទេសលើវិស័យផលិតកម្មមួយចំនួនដូចជា៖ ម្ហូបអាហារនិងភេសជ្ជៈ គ្រឿងសម្អាង និងសម្ភារៈប្រើប្រាស់ផ្សេងៗ។ ចំពោះប្រតិបត្ដិការអាជីវកម្មនេះក៏រួមមាន សហគ្រាសខ្នាតតូចខ្នាតធំ ព្រមទាំងក្នុង និងក្រៅប្រទេសផងដែរ។
ក្រៅពីនេះសភាពាណិជ្ជកម្មកម្ពុជា ក៏មានផ្តល់នូវសេវាកម្មជាច្រើនប្រភេទរួមមាន៖ ជំនួបពិភាក្សាពាណិជ្ជកម្ម ពិព័រណ៍ ប្រឹក្សាយោបល់កិច្ចការធុរកិច្ចអនុលោមតាមច្បាប់និងលិខិតបទដ្ឋានគតិយុត្ដិ និងវគ្គបណ្តុះបណ្តាលទៅតាមតម្រូវការនានា។
ការបោះផ្សាយរបស់សភាពាណិជ្ជកម្មកម្ពុជា៖
