ព័ត៌មាន

សភាពាណិជ្ជកម្មកម្ពុជាចុះអនុស្សរណៈរយោគយល់គ្នាជាមួយ សមាគមអ្នកម៉ៅការជួសជុល និងអ្នកផ្គត់ផ្គង់សម្ភារៈសំណង់សិង្ហបុរី

រាជធានីភ្នំពេញ៖ នាព្រឹកថ្ងៃចន្ទ១៣កើត ខែកត្តិក ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី៣ ខែវិច្ឆិកា ឆ្នាំ២០២៥ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជានិងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា អញ្ជើញចុះហត្ថលេខាលើអនុស្សរណៈយោគយល់គ្នារវាងសភាពាណិជ្ជកម្មកម្ពុជា និង សមាគមអ្នកម៉ៅការជួសជុល និងអ្នកផ្គត់ផ្គង់សម្ភារៈសំណង់សិង្ហបុរី (Singapore Renovation Contractors and Material Suppliers Association-RCMA) ដែលតំណាងដោយ ដាតុ បណ្ឌិត ស្កាយ តាន់ ខេអិល (Dato' Dr. Sky Tan KL) ប្រធានសមាគមអ្នកម៉ៅការជួសជុល និងអ្នកផ្គត់ផ្គង់សម្ភារៈសំណង់សិង្ហបុរី ។ គោលបំណងសំខាន់នៃអនុស្សរណៈយោគយល់នេះ គឺដើម្បីជំរុញកិច្ចសហប្រតិបត្តិការឆ្លងដែន និងលើកកម្ពស់ស្តង់ដារវិជ្ជាជីវៈ ក្នុងវិស័យសំណង់ ការរចនាតុបតែងផ្នែកខាងក្នុងអគារ និងការផ្គត់ផ្គង់សម្ភារៈសំណង់នៅកម្ពុជា ឲ្យស្របតាមដំណើរវិវត្តន៍ដ៏ឆាប់រហ័សនៃវិស័យនេះ។

ចំណុចសំខាន់ៗនៃកិច្ចសហប្រតិបត្តិការរួមមាន៖

• ជំរុញភាពជាដៃគូ និងការរៀបចំផ្គូផ្គងធុរកិច្ច រវាងសមាជិកនៃស្ថាប័នទាំងពីរ។

• ចែករំលែកបទពិសោធន៍ និងគោលប្រតិបត្តិល្អៗ ក្នុងវិស័យថែទាំជួសជុលអគារ ការរចនាតុបតែងផ្នែកខាងក្នុងអគារក្នុងស្ថាបត្យកម្ម និងសំណង់។

• រៀបចំព្រឹត្តិការណ៍រួមគ្នា ដើម្បីជំរុញធុរកិច្ចនិងវិនិយោគ ដូចជា ការតាំងពិព័រណ៍ បេសកកម្មពាណិជ្ជកម្ម កម្មវិធីបណ្តុះបណ្តាល និងវេទិការចនាម៉ូដ។

• លើកទឹកចិត្តឲ្យមានគោលប្រតិបត្តិប្រកបដោយក្រមសីលធម៌ គោរពតាមស្តង់ដារឧស្សាហកម្មអន្តរជាតិ និងទទួលយកដំណោះស្រាយអភិវឌ្ឍន៍ប្រកបដោយចីរភាព។