ព័ត៌មាន

សិក្ខាសាលាថ្នាក់តំបន់លើកទី២ ស្តីពី សេដ្ឋកិច្ចឌីជីថល និងបៃតងក្នុងមហាអនុតំបន់មេគ្គង អភិបាលកិច្ចនិងបរិយាបន្នយេនឌ័រ

The 2nd Reginal Symposium on Digital and Green Economy in the Greater Mekong Sub region: Governance and Gender Inclusion.

———

នៅព្រឹកថ្ងៃអង្គារ ៣កើត ខែមិគសិរ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី០៣ ខែធ្នូ ឆ្នាំ២០២៤ វេលាម៉ោង ៨:៣០នាទី នៅសណ្ឋារគារហៃយ៉ាត់ រីជិនស៊ីនភ្នំពេញ, ឧកញ៉ា គួច ផេង អនុប្រធានសភាពាណិជ្ជកម្មកម្ពុជា​ និងជាសហប្រធានក្រុមការងារ "ឆ" "ផ្នែកផលិតកម្មកែច្នៃសម្រាប់ការនាំចេញ និងកិច្ចសម្រួលពាណិជ្ជកម្ម" ផ្នែកឯកជន តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានសម្របសម្រួលក្រុមការងារទាំង១៦ ផ្នែកឯកជន បានអញ្ជើញចូលរួមសិក្ខាសាលាថ្នាក់តំបន់លើកទី២ ស្តីពី សេដ្ឋកិច្ចឌីជីថល និងបៃតងក្នុងមហាអនុតំបន់មេគ្គង អភិបាលកិច្ចនិងបរិយាបន្នយេនឌ័រ ដែលដឹកនាំដោយ លោក David Verbiwski ភារធារីតំណាងការិយាល័យស្ថានទូតកាណាដានៅកម្ពុជា។ សិក្ខាសាលានេះក៏មានការចូលរួមផងដែរពីសំណាក់មន្ត្រីពាក់ព័ន្ធនៃវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI), សិក្ខាកាមដែលអញ្ជើញមកពីប្រទេសនៅក្នុងមហាអនុតំបន់មេគ្គងដែលរួមមានមកពីប្រទេសកម្ពុជា, ចិន, ឡាវ, មីយ៉ាន់ម៉ា, ថៃ និងវៀតណាមផងដែរ។

សិក្ខាសាលានេះមានគោលបំណងសំខាន់ចំនួន ៣ រួមមាន៖ ១. ដើម្បីឈ្វេងយល់អំពីកំណែទម្រង់អភិបាលកិច្ចក្នុងបរិបទនៃបដិវត្តកម្មឌីជីថល និងបៃតងនៅក្នុងបណ្តាប្រទេសមហាអនុ តំបន់មេគង្គ, ២. ដើម្បីបង្ហាញពីតួនាទីនៃសមធម៌យេនឌ័រក្នុងអភិបាលកិច្ច និងភាពជឿនលឿននៃបច្ចេកវិទ្យា ដែលធានាឲ្យបាននូវ បរិយាបន្ន និងចីរភាព និង ៣. ដើម្បីលើកកម្ពស់ការផ្លាស់ប្ដូរចំណេះដឹង និងកិច្ចសហប្រតិបត្តិការក្នុងចំណោមស្ថាប័នស្រាវជ្រាវក្នុងតំបន់ ដែលផ្តោតលើបញ្ហាអភិបាលកិច្ច និងគោលនយោបាយនវានុវត្តន៍។

សិក្ខាសាលានេះនឹងមានអ្នកស្រាវជ្រាវក្នុងតំបន់មកធ្វើបទបង្ហាញការស្រាវជ្រាវលើប្រធានបទរួមមាន៖ ១. ធុរកិច្ចលើថ្នាលអនឡាញ, ២. អាជីវកម្មអេឡិចត្រូនិក ពាណិជ្ជកម្មឌីជីថល និងសេដ្ឋកិច្ចអន្តរតំបន់, ៣. អភិបាលកិច្ច យេនឌ័រ ភាពចម្រុះ និងបរិយាបន្នសង្គម, ៤. ប្រាក់ចំណូល ទ្រព្យសម្បត្តិ និងការបែងចែកឡើងវិញ, ៥. សេដ្ឋកិច្ចចក្រា, ៦. ចីរភាពដែលជំរុញដោយការប្រើប្រាស់ទិន្នន័យ និងធនធានធម្មជាតិ និងបរិស្ថាន។

គួរបញ្ជាក់ផងដែរថាសិក្ខាសាលានេះរៀបចំឡើងដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ក្រោមការឧបត្ថម្ភគាំទ្រដោយមជ្ឈមណ្ឌលស្រាវជ្រាវដើម្បីអភិវឌ្ឍន៍អន្តរជាតិនៃប្រទេសកាណាដា (IDRC)។

សិក្ខាសាលានេះបានបញ្ចប់នៅថ្ងៃខែឆ្នាំដដែល វេលាម៉ោង ០៤:៣០នាទីល្ងាច ក្នុងបរិយាកាសរីករាយ និងយោគយល់គ្នា។

————

ព័ត៌មានបន្ថែម សូមទំនាក់ទំនងមកតាមរយៈ info.gpsfccc@gmail.com

#gpsfcambodia #pswg #gpswg #cambodiachamberofcommerce #សភាពាណិជ្ជកម្មកម្ពុជា #ccc