BECOME A MEMBER
ព្រឹកថ្ងៃទី៦ ខែឧសភា ឆ្នាំ២០២១ លោកសេន រិទ្ធ លេខាធិការ តំណាងសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ បានអញ្ជើញចូលរួមកិច្ចប្រជុំសាមញ្ញលើកទី២៤ របស់ក្រុមប្រឹក្សាខេត្ត អាណត្តិទី៣ ក្រោមអធិបតីភាព ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ដោយមានការអញ្ជើញចូលរួមផងដែរ ពី សមាជិក សមាជិកា ក្រុមប្រឹក្សាខេត្ត អភិបាល អភិបាលរង ក្រុង-ស្រុក ប្រធាន អនុប្រធានមន្ទីរ មន្រ្តីចំណុះសាលាខេត្ត មន្រ្តីនគរបាល កងរាជអាវុធហត្ថ និងអង្គភាពពាក់ព័ន្ធជុំវិញខេត្ត។ល។
កិច្ចប្រជុំនេះ ធ្វើឡើង ដើម្បីពិនិត្យ ពិភាក្សា និងអនុម័ត លើរបៀបវារៈសំខាន់ចំនួន ៣ ៖
១. ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី២៣
២. ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចំាខែមេសា ឆ្នាំ២០២១ ស្តីពីការអនុវត្តការងាររបស់រដ្ឋបាលខេត្តសៀមរាប
៣. បញ្ហាផ្សេងៗ
ក្នុងកិច្ចប្រជុំនោះដែរ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានមានប្រសាសន៍ថា បញ្ហាកូវីដ ១៩ បច្ចុប្បន្ន កំពុងប្រឈមខ្លាំង ក្នុងព្រឹត្តិការណ៍សហគមន៍ ២០កុម្ភៈ ដែលក្នុងខេត្តសៀមរាប មានអ្នកឆ្លងជាង ៦០នាក់ ហើយយើងត្រូវអនុវត្តសេចក្តីណែនាំលេខ០៣ សណន ចុះថ្ងៃទី០៤ ខែឧសភា ឆ្នាំ២០២១ របស់រាជរដ្ឋាភិបាលឲ្យមានប្រសិទ្ធភាពខ្ពស់ ដើម្បីពង្រឹកនូវការគ្រប់គ្រងបញ្ហានេះ។
ជាមួយគ្នានោះដែរ ឯកឧត្តម ទៀ សីហា អភិបាលនៃគណៈអភិបាលខេត្ត បានមានបញ្ជាក់ដែរថា រដ្ឋបាលខេត្ត នឹងយកចិត្តទុកដាក់បន្ថែមទៀត ការពារជំងឺកូវីដ១៩ ដែលកំពុងរីករាលដាល ដោយអនុវត្តវិធានការចាំបាច់នានា បង្ការ និងទប់ស្កាត់ ការឆ្លងរាលដាលនៃជម្ងឺកូវិដ-១៩ នៅក្នុងភូមិសាស្រ្តខេត្តសៀមរាប។ បន្ថែមពីនេះដែរ ឯកឧត្តម ក៏បានអំពាវនាវ ដល់ បងប្អូនប្រជាពលរដ្ឋរស់នៅក្នុងខេត្តសៀមរាប សូមចូលរួម បង្កើនការប្រុងប្រយ័ត្នខ្ពស់ ក្នុងការអនុវត្តវិធានការរបស់រាជរដ្ឋាភិបាល គឺ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព។
អត្ថបទ និងរូបភាពដោយ៖ សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ
